புத்தனை விழுங்கிய புழு

 புத்தனை விழுங்கிய புழு ... 

தன் நிழலிலேயே 

இளைப்பாறும் பறவை ஒன்றின்

பறத்தலின் வேகத்தை

கற்பனை செய்பவன்  

வருத்தங்களை எடைக்குப் போட்டால் 

யார் வாங்குவார் என

புலம்பித் திரிந்து

தற்கொலை நொடிகளை 

எடை  கற்களாய் வைத்து

பிடித்தமான சொற்களை

தராசில் வைக்கிறான் 

தராசு இயல்பு இழந்து 

சுழித்து ஓடும் நதியில் விழுகிறது

விழுங்கிய மீனொன்று 

நீருக்குள் மூழ்கும் தன்மை இழந்து மிதக்கிறது

காற்று உள்ளே அமிழ்த்த முயன்று தோற்று

எடை கற்களை தராசை

சிக்கெடுக்கிறது 

மீன்கொத்தி அதைக் கொத்தி

பறக்கும் திறன் சரிந்து வீழ்கிறது

வேடனுக்கு அம்பு மிச்சம்

அனலில் வாட்டிய பிறகு 

எல்லா பசியற்றும் போகிறான்

பசியற்ற உடல் எடையற்று

தூக்கில் தொங்கும் போது

மரத்தின் இலைகளில் ஒன்று அதிகம்

புத்தனை விழுங்கிய புழு

தியானம் கடந்து உறங்குகிறது
இன்னொரு உடலின் கனவில்.